Bechain Baarish!!!

Kamre ki khidki se lagi kursi pe baith ke ek kitaab padh rahi thi mai ik roz..

Ke achaanak se khidki ke bahar ka mausam badal gaya aur baarish shuru ho gayi..

Mera mann ek chhote bachhe ki manind khil gaya

Aur uchhal uchhal ke baarish ka maza lene laga 

Aur mai chupchaap khidki ke bahar baarish ko dekh rahi thi

Magar wo baarish shaant nhi thi

Bohot bechaini si bhari thi usmein

Jaise ek toofaan samet rakha ho usne khud mei

Baarish dekh ke jo shanti mehsus hoti thi mujhe, us din waisa nhi tha

Ek gubaar tha, gusse ka.. ya gum ka, ye samajh nhi aa raha tha 

Baarish ki ek ek boond jaise kuch kehna chah rahi thi.. kuch batana chaah rahi thi

Ya usne dekh liya tha kisi  ko mushkil mei, aur keh rahi thi ke bacha lo use

Lekin kitni der pukarti wo kisi ko..

Kitni der..

Aur fir khatam ho gayi.. shant ho gayi

Ruk gaya wo toofaan..

Aur chhod gaya peechhe ek gehra sannata 

Jiske aage baaki saare shor shant ho chuke the

Baarish tham gayi thi...

Toot chuka tha uska dum..