Bewafa Neend

Kal raat kuch ajeeb thi..
Badan thaka hua tha,
Magar neend ka kuch ata pata nhi tha

Kuch aisa khaas to nhi hua tha
Magar kuch bekarari thi dil mei
Main,  jo bistar pe padte hi nindiya nagari mei pahuch jaati hun
Jag rahi thi
Aur Neend ka kuch ata pata nhi tha..

Mujhe laga aa jayegi neend
Par jaane Kitne baadal baras gaye
baras ke shant bhi ho gaye
Magar neend ka kuch ata pata nhi tha

Meri aankhon se jo baarish baras rahi thi
wo rukne ka naam nhi le rahi thi
Lekin kisi ko iski khabar bhi nhi thi
Sab log so rahe the,  neend ke aagosh mei,
Aur meri neend ka kuch ata pata nhi tha

Main khidki ke paas baithe barish ko aate jate,  baraste rukte dekh rahi thi
Kal uski aawaz bhi kuch sakoon nhi de pa rahi thi
Aur Neend ka kuch ata pata nhi tha..

Door ke ped par se panchhiyon ki aawaz aane lagi thi
Panchhi uth ke apne kaam pe nikal chuke the
Aasmaan bhi siyah se neela ho chala tha
Magar, meri neend ka kuch ata pata nhi tha